«Errituak garrantzitsuak dira, baina bada bestelakorik ere: hurbiltasuna, kasurako»

Antton Valverde, musikaria.

Musika eta literatura batera, Lauaxeta, Lizardi eta Leteren poemen inguruko '3Lak' emanaldia eskainiko du Valverdek pianoarekin, Anjel Lertxundirekin batera gaur Donostian.

Antton Valverde (Donostia, 1943) kantugilea Anjel Lertxundirekin batera arituko da gaur, 19:00etan, Donostiako San Telmo museoan, Lizardi, Lauaxeta eta Xabier Leteren inguruko 3Lak musika eta literatura emanaldian.

«Etxea kartzela bihurtu digute, eta kontzeptua berreskuratzeko garaia da»

 Samuel Gallastegi, irakaslea.

'Prozesu konstituziogilera' mintegia koordinatu du Gallastegik. Espainiako Konstituzioa kolokan jartzeko eta Europan konstituzio bermatzaile bat eratzeko prozesua aztertzen ari dira Iruñean.

Samuel Gallastegi (Mungia, Bizkaia, 1982) irakaslea da. Iruñean bihar arte egingo duten Prozesu konstituziogilera mintegiaren koordinatzailea da. Espainiako Konstituzioa kolokan jarri eta Europan berdintasuna bermatuko duen konstituzioa sortzeko prozesua aztertzen ari dira, 17:00etatik aurrera, Nafarroako Unibertsitate Publikoko Arrosadiako campuseko A-09 gelan.

«Elikagai bat ekologikoa eta osasungarria izatea ez da aski; begiratu atzean duena»

 Patricia Dopazo, agroekologoa.

Kutsadura iturri nagusia lantegiak direla uste duenak huts egiten du: elikagaien industriak CO2ren erdia inguru sortzen duela azalduko du Dopazo ingeniari teknikoak, 'Asfixia en el supermercado' hitzaldian.

Patricia Dopazo (Alacant, Herrialde Katalanak, 1978) nekazaritzan ingeniari teknikoa da, eta ingurumen zientzian lizentziatua. Agroekologian adituak Asfixia en el supermercado hitzaldia emango du Mundubat erakundeak antolaturiko Ekarpen feministak eta ekologistak elikadura burujabetzari mintegian. Gaur, 16:30ean hasita, Bilboko Hikaateneoan.

«Bankugintza etikoa benetako aukera bihurtuko da udaberri aldera»

Iker Espuñez, dokumentalgilea.

Bankuen jokabidea munduko bazter urrunen arazo gisa ikusten zen, hemen ere etxeei azpiak jaten hasi den arte. Gertatutakoa eta dauden aukerak 'Con tu dinero' filmean azaldu ditu Espuñez zuzendariak.

Ikus-entzunezkoak sortzen ditu Iker Espuñezek (Bilbo, 1978), eta Setem Hego Haizea gobernuz kanpoko erakundearekin elkarlanean dabil azken urteotan. Con tu dinero dokumentala estreinatu berri du. Bankuen jarduera aztertzen du, eta bankugintza etikoaren berri ematen du. Gaur erakutsiko dute lana, 19:30ean, Bilboko Golem zinema aretoetan, eta bihar, 19:00etan, Donostiako Koldo Mitxelena kulturunean.

Con tu dinero dokumentalaren irudi bat.