«Gero eta gizon gehiagok eskatzen diote emakumeari sarketa egiteko»

Sejo Carrascosa, idazlea.

'Por el culo. Políticas anales' liburuaren egileetako baten arabera, ipurdiko zuloaren inguruan genero nortasunak eraikitzen dira, eta horietan oinarritutako bazterketa politikoak. Gaur aurkeztuko dute.

Sejo Carrascosa (Madril, 1959) ekintzaile gay beteranoa da. Por el culo. Políticas anales liburua idatzi du Javier Saez soziologoarekin. Gaur aurkeztuko dute lana, 19:00etan, Montehermoso kulturgunean (Gasteiz). 

«Espiritu independentista bera dago Quebecen, Euskal Herrian eta Katalunian»

NICOLAS PELLERIN, MUSIKARIA.

Argazkilaria: Mario Groleau.

Quebeceko musika tradizionaleko talderik arrakastatsuena da Nicolas Pellerin Et Les Grands Hurleurs. Folka funkarekin eta elektronikarekin nahasten dute, herrialdeko ahozko ondarearekin.

Nicolas Pellerin Et Les Grands Hurleurs hirukotea Quebeceko musikan talde arrakastatsuena izan da azken hilabeteotan. 2010. urtean inork baino sari gehiago jaso zituzten, Felix saria tartean, azken diskoarengatik. Pellerin (Saint-Elie-de-Caxton, Quebec) eta garrasilari ikaragarriak Euskal Herrian daude lehen aldiz, eta bi kontzertu emango dituzte Gipuzkoan. Gaur, Eibarren joko dute, 20:00etan, Coliseo antzokian. Bihar, 19:00etan, Zizurkilgo Atxulondo kultur etxean arituko dira.

«Fukushima irakaspena da: azkartu behar dugu energia garbietarako trantsizioa»

XABIER BARON, NAFARROAKO GREENPEACEKO KIDEA.

Japoniako ezbehar nuklearraren itzalpean, biomasaren eta beste energia iturri berriztagarrien inguruan mintzatuko dira gaur, Iruñean, 'El Mundo de Los Pirineos' aldizkariak antolatuta.

Xabier Baron (Iruñea, 1976) informatika irakaslea da ofizioz, baina Greenpeace erakundearen Nafarroako eledun aritzen da. Biomasa, gure basoetako beroa mahai inguruan hartuko du parte, gaur, 19:00etan, Nafarroako Elkar aretoan. Baronekin batera, Ultzamako alkate Patxi Perez mintzatuko da. Biomasa erabiltzen aitzindaria da Nafarroako herria.

«Gaurko gurasoek beldurra diote gatazkari, eta gatazkak haurrak indartu egiten ditu»

AMAIA VAZQUEZ. PSIKOLOGOA

Haurtzaindegian gero eta ordu gehiago pasatzen dituztela eta, haurren artean asko zabaldu da abandonatua izatearen sentipena, psikologoak dioenez. Horri aurre egiteko moduak proposatuko ditu.

Nola landu gure seme-alaben autoestimua eta autonomia hitzaldia emango du gaur Amaia Vazquez psikologoak (Deustua, Bilbo, 1961). Haurren artean zabaldu diren gaixotasun asko abandonatuak izatearen sentipenetik datozela dio. Hitzaldia 18:00etan egingo du, Getariako udaletxean (Gipuzkoa).

«Musika bortitz piloa zegoen 199oeko hamarkadan, eta horrela hasi zen gerra aroa»

MARK OLSON, MUSIKARIA.

The Jayhawks taldeko sortzaile gisa folk independentearen aitapontekoetako bat da musikari estatubatuarra. Bob Marleyren anaitasun eta itxaropen gogoa bere egin du azken diskoan.

Mark Olson musikariak (Mineapolis, AEB, 1961) Many Colored Kite diskoa besapean ekarriko du gaur Bilbora, 20:30ean, Cotton Club aretoan. The Jayhawks taldea sortu zuen 1980ko hamarkadan, eta bere bakarkako ibilbideari ekin zion taldea arrakastaren gailurrean zegoenean.

«Elizak, Estatuak eta sendagileek lortu dute denok sexualitate ziztrina izatea»

Diana J. Torres, artista

Feminismo klasikoaren ekinbidea baztertu eta «pornoterrorismoa» proposatzen du sortzaileak. Txalaparta argitaletxearekin argitaratu berri duen liburua aurkeztuko du, performance baten bidez.

Diana J. Torres artistak (Madril, 1981) batez ere performancea eta bideoa erabiltzen ditu bere lanean, baina Pornoterrorismo liburua argitaratu berri du Txalaparta argitaletxearekin. Aurkezpena egingo du gaur, 22:00etan, Emakumeen Liburutegian (Tejeria 28, Iruñea), eta performancea, 22:00etan, Subeltz aretoan.

«Hazten jarraitzeko, laster, dena egunero bota beharko dugu, dena berriz erosteko»

Cosima Dannoritzer, dokumentalgilea.

Bonbillen iraupena gutxitzeko industriak hasitako konspirazioa gure ekonomiaren funts bihurtu dela azalduko du zuzendari alemaniarrak Donostian, dokumental batekin eta solasaldian.

Cosima Dannoritzer zinemagileak (Dortmund, Alemania, 1965) zaharkitze programatua ikertu du The Light Bulb Conspiracy (Comprar, tirar, comprar) dokumentalean. Kontsumitzailearen Egunaren harira, lan hori emango dute gaur, 19:00etan, Kristina Eneko Ingurumen Baliabideen Etxean (Donostia), eta Dannoritzerrekin hitz egin ahalko da.

«Europako Batasunak saldutako armekin ari dira orain Gaddafiren militarrak»

2011-03-10

Jordi Calvo, bakearen aldeko ikertzailea.

BBVA bankuak armen salerosketan egiten duen negozioaren berri emango du gaur Bilbon Justicia i Pau erakundeko kideak, Bilboko banketxearen akziodunen batzarraren bezperan.

 

Jordi Calvo Rufanges (Castello, Herrialde Katalanak, 1975) ekonomialaria da, eta Justicia i Pau erakundean ikertzaile lanean ari da. BBVAk armen ekoizpena nola finantzatzen duen azalduko du gaur, 19:30ean, Ekoetxean, Bilbon (Pilota kalea, 5). Hitzaldian parte hartuko du Akgun Ilhanek, Kurdistango Heskif hiria salbatzeko ekimeneko kideak. BBVAk lagunduriko urtegi egitasmo baten mehatxupean dago hiria.

Libian hegazkinik gabeko gunea ezartzeko bideen bila ari dira AEBak eta Europako Batasuna. Laster ikusiko al dugu Mendebaldean eginiko hegazkinen arteko borroka?

Arma saltzea ere Mendebaldearen esku-hartze militarra izan da, zeharkakoa bada ere, negozio horren bidez. Gaddafiri arma bahimendua kentzea oker bat izan zen, eta orain ikusten ditugu ondorioak. 2009. urtean soilik 344 milioi euroko armak saldu zizkioten Europako Batasuneko herrialdeek Libiari. EBren txosten ofizialetik atera dugu datua. Bi arma mota nabarmentzen dira: fusilak, pistolak eta metrailadoreak alde batetik, eta airekoak bestalde. Gaddafiren militarrek egin dituzten erasoak arma horietan oinarritzen direla entzuten ari gara. Beraz, ziurrenera, EBk saldutako armak erabiltzen ari dira orain herritar zibilen aurka.

BBVA armen negozioan nabarmentzen dela salatu duzue. Mendebaldeak babesturiko diktadura arabiarrak armatzen lagundu al du?

Espainiako Estatuak ez du trabari jarri Libiari lau milioi euroren armak saltzeko azken urteotan. Horrek Espainiako zein Europako Batasuneko legedia hausten du, demokrazia eta giza eskubideen gutxienekoak betetzen ez dituzten herrialdeei armak saltzea galarazten baitie. BBVAk modu asko ditu arma industriari laguntzeko: maileguak ematen dizkio, bonuak saldu eta enpreson akzioak eskaintzen dizkie bezeroei. Arma enpresekin harreman handiena duen bankua da Estatuan. Eta ez dira edonolako armak: pobreturiko uranioa dituzten armak, luku bonbak eta arma nuklearrak egiten dituzten munduko enpresarik handienetako 16ri laguntzen die BBVAk. Gehienak AEBetakoak dira.

Zer da zaindu beharreko lehena: zer saltzen den ala nori saltzen zaion?

Eskatzen dugun lehena oso erraz eman daitekeen gauza bat da: gardentasuna. Orain ez dago gardentasunik armen salerosketan. Herrialde ia guztietan estatu sekretupean daude datuok. Zerrenda beltzak eratzeko irizpideak, ordea, badirudi soilik herrialde mota batekin erabiltzen ditugula, eta inoiz ez Mendebaldekoekin. Nola sal dakizkieke armak AEBei, edo Erresuma Batuari, edo NATOko kideei, gaur horiek ari badira egiten gerra gehien euren lurraldeetatik kanpo? Italian, mugimendu bakezalearen borrokari esker, gobernuak berak urtero egin behar du txosten bat armak nori saldu dizkion eta nork finantzatu dituen kontatzeko. Italiak egiten badu, zergatik ez beste herrialdeek? Helburua, halere, ez da gardentasuna, baizik eta desarmatzea, eta arma salerosketa ahalik eta gehien mugatzea.

Zer esango diezu BBVAren akziodunei?

Gehienek ez dakite euren bankuak azken bost urteotan 1.000 milioi euro baino gehiago erabili dituela pobreturiko uranioa dituzten armak, luku bonbak eta arma nuklearrak sortzen dituzten enpresekin lan egiteko. Bankuak iragarriko dien 4.600 milioi euro pasatxoko irabazien zati bat etikoki gaitzesgarriak diren negozioetatik datorrela jakin behar dute txalo egin aurre

«Legez kanpoko zinemarik benetan ote dagoen argitu nahi dugu»

Jorge Nuñez, zinema Ilegalaren koordinatzailea.

Serbian sorturiko mugimenduaren eskema jarraitzen duen egitasmoa hasiko da gaur Bilbon. Filma eztabaidarako aitzakia gisa erabiltzen da, eta zinema aretoa harremanetarako gune bihurtzen da.

Jorge Nuñez (Santurtzi, Bizkaia, 1983) Arte Ederretan lizentziatua da eta tesi bat idazten ari da «ikuslearekin jolasten» duten filmen inguruan. Zinema Ilegala egitasmoaren koordinatzailea da eta gaur aurkeztuko du lehen saioa, 19:00etan, Bulegoa aretoan, Bilbon (Solokoetxe 8).

«Europan hiru greba orokor egin dituen estaturik gabeko nazi0 bakarra da geurea»

Igor Urrutikoetxea, LABeko nazioarteko idazkaria.

'Krisi kapitalista Europan eta euskal askapen prozesuan' jardunaldien lehen saioan mintzatuko da LABeko kidea. Europa eta herrialde arabiarren arteko aldeak eta Islandiako eredua nabarmentzen ditu.

Igor Urrutikoetxea (Lezama, Bizkaia, 1975) LAB sindikatuko nazioarteko idazkaria da. Krisi kapitalista Europan eta euskal askapen prozesuan jardunaldietan mintzatuko da gaur, Iñaki Gil de San Vicenterekin batera, 19:30ean, Koldo Mitxelena Kulturunean (Donostia). Gaur hasiko dira jardunaldiak eta bihar izango dute bigarren saioa Bilbon. Azkena Iruñean egingo dute, etzi.